本文重點
中石化班管理層近排都幾頭痛，事關該公司早前因為「裸油價」風波引起嘅公憤仲未平息，近日內地網站又傳出中石化新大樓淨係盞吊燈就值1,200萬，呢種窮奢極侈嘅行為當然即時引來網民罵聲四起，搞到公司要即時澄清絕對無咁嘅事。
傳值1200萬急澄清
近日內地網站有篇熱爆嘅文章，叫做《朋友去中石化參觀了價值1,200萬的天價吊燈》，仲要隨文附有照片。有唔少網民即刻將「天價燈」同一個月兩次加油價連繫埋一齊，痛斥中石化因油價上調利潤大漲就奢侈浪費，仲有網民聯想到中石化之前講過舊年為咗社會責任煉油實際虧損千幾億，忍唔住諷刺佢舊年實際虧損超過9,500盞吊燈。
不過，中石化負責人已澄清絕對唔會買咁貴嘅燈，仲話盞吊燈所有票據同資料隨時可接受相關部門調查。有網民搵燈飾生意嘅朋友鑑定過，話盞燈應該只係值100萬，最多都唔會超過300萬咁話。
余絲韻