本文重點
呢排天氣又熱又焗，加上保險公司啲生意冇乜大起色，唔少圈中人都被悶親，索性放大假消暑去也。不過，中保國際（00966）同民安控股（01389）高層就好唔得閒，佢哋幾乎係睇住個日曆趕住做嘢，目標係十一月前完成民安私有化工程。
民安就嚟私有化，一班管理層工作嘅重心即刻唔同晒，同大家最有切身關係嘅就係中期業績，如果進程順利嘅話，嚟緊要公布嘅中期業績將會直接喺港交所（00388）公布，管理層就唔會見分析員同記者嘞！
須由開曼法院通過
聽民安內部人士講，前日中保國際特別股東大會通過晒啲收購議案後，會正式同民安「提親」，咁先至輪到民安進行應有嘅私有化程序。排期開股東大會、搵獨立財務顧問畀股東專業意見等工作都唔成問題，原來最難控制嘅係開曼法院嘅排期時間。
民安嘅註冊地喺開曼，程序上要經過當地法院通過，唔講唔知，原來開曼法院好繁忙，忙到大家一提到去排期就「失晒預算」。
余絲韻