本文重點
早前德昌電機（00179）因為揀咗喺規矩多多嘅香港會舉行股東會，引嚟好大回響，雖然公司已經好快咁向股東發出「溫馨提示」，提醒股東留意衣着，講明「牛仔褲、T恤、運動裝、短褲、運動鞋及人字拖均在不接受裝束之列，且於任何時間在會所內亦不得穿着牛仔服裝」，不過公司可能再諗清楚，都係唔太方便股東，所以尋日發出公告決定更改股東會地點，由原來嘅香港會改為尖沙咀帝苑酒店，日子則由七月二十九日延遲至八月二十四日。
會所規矩多 恐招話柄？
雖然德昌無交代到點解要改地點，但絲絲估計，都係因為街外股東意見實在太多，其中有唔少話公司因為想避見股東同傳媒，所以揀喺香港會開股東會，企圖「隔一隔」。
不過絲絲尋日同一個公關老友傾偈，佢話依家喺中環、金鐘一帶搵酒店搞Function真係唔易，貴都唔在講，而且好爆，成日搵唔到場，反而香港會原來唔係絲絲心目中諗得咁貴，加上佢又設咗會員制，即係話街外人想喺嗰度Book場搞Function都唔得，所以係一個唔錯嘅選擇。不過嗰度規矩始終係多，所以今次德昌最終決定更改股東會地點，都算係從善如流啦！
余絲韻