平時見泓福資產管理研究部主管及執行董事鄧聲興（Kenny）講股滔滔不絕，為人亦好健談。不過佢同絲絲講，原來佢細個時係較文靜怕醜，落街玩都係一個人多。Kenny話，踩單車就係佢當時最鍾意嘅活動之一，而嗰時所住嘅美孚新邨，由於附近有好多平台、公園等空曠地方，正是踩單車嘅好地方。
除咗鍾意踩單車，Kenny更熱愛揸車。有幾熱愛？佢話喺澳洲讀大學第一年，就立即喺當地考車牌，更試過揸車進入沙漠。佢話澳洲珀斯嘅環境好特別，沙漠隔籬竟可以綠樹成蔭，而沙漠內嘅石頭可以用手掌劈開，令佢大開眼界咁話。到依家大個咗，Kenny則較鍾意一啲靜態活動，睇戲同唱卡拉ＯＫ係至愛。嘩！絲絲好想聽佢唱歌添！
熊市造就低吸良機
Kenny話哂有經濟學博士銜頭，少不免要問佢幾句對經濟同股市嘅睇法。佢話，股市調整係正常現象，正如經濟有周期一樣，有上有落，但股市大趨勢總係向上嘅。因此，熊市有時係好事，為我哋提供一個寶貴嘅低吸機會，股友其實不用因大跌市而太悲觀。佢認為依家港股已進入牛市，應逢調整吸納。
鄧聲興小檔案
洋名：Kenny
現職：泓福資產管理研究部主管及執行董事
中文大學全球政治經濟社會學碩士課程兼任講師
學歷：北京中國人民大學經濟學博士
澳洲Edith Cowan University金融及財務管理學位
部分公職：香港專業財經分析及評論家協會副主席
偶像：股神巴菲特
余絲韻