讚財經傳媒夠專業

唔知係咪臨別在即，絲絲覺得任志剛篇演辭好感性，大談同財經傳媒嘅16年感情，話非常欣賞本港財經新聞界朋友嘅質素同埋工作熱誠，已經同大家建立咗深厚同埋緊密嘅關係。

做金管局也好，做傳媒也好，既然是為大眾服務，最想嘅當然係得到大家嘅肯定。尋日任志剛對本港財經傳媒嘅句句心底話，相信令唔少同業感到十分欣慰。

任志剛字字鏗鏘道：「傳媒界嘅同業喺金融市場發展方面擔當極其重要角色，我謹此對佢哋嘅專業精神和水平衷心致意。」佢解釋用「同業」來稱呼傳媒朋友，係因為喺呢16年做金管局總裁嘅日子，同大家建立咗深厚感情，而且由佢撰寫嘅《觀點》文章，過去11年無間斷受到傳媒擁戴、期期連載。

講開《觀點》，任志剛都不忘講吓當下金融市場發展。佢話正同相關夥伴積極推展三項工作，包括擴展本港人民幣業務、亞洲債券基金，以及拓展本港伊斯蘭金融市場，佢提醒，一切工作要吸取過往嘅經驗，避免市場失效。

余絲韻