國務院總理溫家寶日前表示，即使經濟有好轉迹象，但並唔代表困難時期經已過去。不過，美國總統奧巴馬嘅睇法就相反，認為美國第二季經濟情況已有好轉，無意推出第二輪的振興經濟方案。到底邊個嘅睇法啱，惟有由時間去話畀我哋知。
港股方面，踏入七月中旬，唔少基金經理都已經好似學生咁提早放暑假。諗真啲，港股呢個升浪由三月開始，至六月中為止計升足兩個半月，基金大戶搵搵埋埋唔少，放番個開心暑假亦無可厚非。按此推斷，估計八月底前港股都會呈無人駕駛局面，唔會有明顯方向。不過，就算大戶離場，留守陣地嘅散戶仍然不愁寂寞，好似近日炒到㷫合合嘅新股咁，就真係一浪熱過一浪，上周五首日上市嘅琥珀（00090），一升就升63%，成為今年新股首日升幅之冠。今日輪到隻志高（00449）登場，即管睇吓會唔會再有驚喜。
（小尾）