上個星期港股牛皮偏軟，恒指雖失守萬八關，但又守得住17,600水平，暫時無乜方向，市場資金集中炒新股。多得第一視頻（00082）上周再現突破，股仔炒作氣氛改善，詩詩所持的國美（00493）亦曾重返1.9元，不過小妹打算接收供權股後供股，手持股份則待下周接受供股期間炒上沽出。至於中國風電（00182）亦繼續持有，待整固完成，走勢料可再見突破。由於持貨佔組合七成，未有買入聯康生物（00690），本周或再搵位上車。
國美預咗供股期間會抽上，至於已完成供股的亨泰（00197），供股新股出籠，參與者贏到笑，所以沽貨套利，大戶就趁低收貨。亨泰股價上周五重現升勢，重上0.4元，成功擺脫一浪低於一浪的走勢，睇嚟供股獲利貨已盡入強中手，隨時再展新升浪。
亨泰相對其他內地消費股，現價唔算貴，供股集資用於發展農業及擴建中山物流中心，支持業務擴展。亨泰的一站式服務平台亦受惠中國消費繼續增長，化妝品、滋補、護膚、冷凍及鮮果等高毛利產品銷量增加，這些產品已佔總營業額44%，增長潛力佳。
詩詩