Baby：男人係咪都貪新忘舊㗎呢？

大健：（佢發生咩事呀？﹗）先唔好針對男人，我估人類都係有啲貪新忘舊嘅傾向。

Baby：點解你唔正面回答我嘅問題？睇嚟你都係貪新忘舊嗰種人。我開始懷疑神創造女人時唔止從男人身上拎走一條肋骨，仲錯手拎走埋長情嘅基因。

大健：唔正面回答係因為我細膽，唔想犯「煲呔」嘅覆轍。更重要係你有無諗過點解人會貪新忘舊呢？

新歡倍升 舊愛潛水

Baby：貪新忘舊係人嘅天性囉！

大健：麻煩你理性啲先。舉個例子，如果煎雞蛋唔覺意煎燶咗，最快解決方案係點呢？當然係即刻剷起隻蛋，因為愈煎只會愈燶。何不趁早放棄，煎過另一隻呢？

Baby：呢個係咪叫做藉口呢？

大健：再舉個例，港股最近浮浮沉沉，悶到想瞓，但係新股就好有睇頭。好似上周五掛牌嘅琥珀能源（00090）首日就比招股價升63.25%，每手賺成2,100蚊。如何可以不貪新呢？

Baby：所以連內地股市都出現新股狂熱囉，上周五內地A股兩隻新股桂林三金同萬馬電纜，分別升八成二同1.25倍。資金瘋狂追捧，所以話人真係貪新忘舊嘅動物。

大健：講真，除非無得揀啫，如果可以煎過隻靚蛋，何必要辛苦自己呢？你估貪新又會無風險咩？正如大家都知新股必升嘅傳奇早已破滅，我都識唔少股友揸住啲「潛水新股」，隨時新不如舊。我都勸佢哋「煎過隻蛋」。

Baby：咪係囉！貪新鮮之後發現新不如舊，就食回頭草，世事邊有咁着數！知唔知咩叫做尊重㗎呢？

大健：要人尊重亦要自己有內涵嘅。

燶蛋不會煎到變生蛋

Baby：可能現代人只知追求愛情，唔記得咩叫感情。

大健：……如果唔開心又何必勉強呢？雞蛋只會愈煎愈燶，我無見過燶蛋煎到變生蛋。最緊要貪新時揀啱對象啫。

Baby：今日有隻志高控股（00449）掛牌，希望唔好令股友失望喇。

大健：我更加期待隻北京金隅（02009），本周五開始招股，不妨攞本招股書睇睇。如果你仲記得幾年前Hit過嗰本《Who Moved My Cheese？》。改變唔可怕，後知後覺才可怕。

恒指失守50天線離場

Baby：舊股唔爭氣，炒新股都好合理。

大健：係呀。恒指上周收報17,708點，一周跌2.72%，只係僅僅守到50天平均線（上周收市喺17,696點）。如果恒指真係失守50天平均線我就會沽貨離場，甚至反手買Put輪或熊證。

Baby：會唔會過分簡單呢？

大健：呢個方法往績唔錯㗎！好似令你早喺舊年六月沽貨，避開「金融海嘯」，又會識得喺今年三月入市，捉到最近呢次升浪。當然唔係百發百中，但最緊要長線輸少贏多啫。

Baby：其實投資唔止得股票嘅。今次《東方產經》網上民意調查都問股友，港股欠缺方向，但銀行積極吸納人民幣存款，你會趁機將股票投資轉向人民幣存款嗎？截至上周末晚上六時，結果話會和唔會分別有40%和42.2%，剩低17.8%就係考慮當中。

大健：同意，呢啲叫分散風險。

Baby：所以我會同一時間煎好多隻雞蛋。

（Baby）（大健）