歐洲魚缸亦唔見得好樣去邊，米字旗國魚缸連跌四周，倫敦富時100指數周五報4,127點，下跌31點。歐洲其他兩大主要股指紅酒國CAC指數及啤酒國法蘭克福DAX指數亦同樣下跌。在花旗魚缸掛牌的ADR大致回落，上周五在花旗掛牌的ADR普遍向下，只有大笨象（00005）逆市上升。

上周無論花旗魚缸或本地魚缸均牛皮偏軟，恒指累跌近500點，但波幅只有750點，成交額則徘徊五六百億之內，若然外圍魚缸持續腳軟，本地魚缸將進一步下調。雖然祖國魚缸強勢，但本地魚缸跟唔上，市場資金集中玩登陸魚缸無幾耐的新丁，古勝預計今個禮拜本地魚缸都係牛皮居多。值得留意係花旗魚缸上星期空軍大舉出擊，出動子彈暫為近3個月最多，只要稍有負面消息出現，唔排除大戶有藉口做淡。恒指則表現牛皮，古勝最怕十個牛皮九個淡，恒指上周多次下試50日線支持位，一旦失守，恒指有機會低見16,300至16,500的250日線水平。在下一向都話無謂估頂或摸底，總之魚缸死唔去，日日有得入場炒，一於炒股唔炒市。

上周五琥珀能源（00090）首日登場，較招股價勁升逾六成，能源及相關股份有條件再落鑊。祖國資訊中心發表研究報告表示，正在制訂中的新能源振興規劃，將提升二○二○年的目標，核電、風電、太陽能的運行裝機容量，將投放3萬億元人仔的資金，大力增加對新能源產業的投資。中央將對新能源實行專案支援，包括財稅和價格補貼、成本與風險分攤機制等多種優惠政策，並設立新能源技術研究重大科技專項資金，重視傳統能源行業的改造升級。新能源產業，未來將成為祖國新的經濟增長點。

風電定單需求大增

中國高速傳動（00658）係祖國最大的風力發電變速箱製造商，當然受惠呢項國策。集團跟花旗通用能源（GEEnergy）、REPower及Nordex等企業合作，技術獲國際肯定。由於花旗市場表現欠佳，公司早前決定減少為最大的客戶通用供應風電齒輪，將重心放回祖國市場。祖國大力發展新能源，在祖國市場需求及平均售價提升下，相信公司毛利率會有所提升。中傳動上年份成績表表現不錯，純利6.92億元，上升1倍多。集團今年6,000兆瓦風電定單已定滿，明年更有心增至9,000兆瓦，接單接到手軟，前景確係不俗。

古勝