本文重點
互聯網講求互動性，滙豐網站都走多元化路線，近排仲搞埋投資評論嘅短片，滙豐亞太區個人理財業務部財富管理業務主管李錦榮（Bruno）亦「踩過界」，做埋節目主持人，次次請嚟唔同嘅基金經理同業務主管，傾吓經濟、市場動向及投資策略。
範疇廣泛反應唔錯
有乜嘢猛人上鏡？包括有鄧普頓資產管理執行主席麥博士、貝萊德副董事長兼全球股票投資總監博多爾、滙豐環球投資管理旗下Halbis投資管理股票投資管理董事黃子驊同埋董事兼債券投資部主管陳寶枝等，涉及投資範疇真係十分全面。
近排個市愈升愈有，但唔少人已經畀金融海嘯嚇窒咗，周圍搵啲保本同低風險嘅投資對象，唔似得以前個個都係買股票，所以呢個節目都走多元化路線，乜嘢投資產品都講吓，連宏觀經濟都一樣同觀眾分享，等大家齊齊學「睇勢」。
Bruno做主持講投資分析，據聞反應唔錯，推出到依家已有6萬幾人睇過，睇嚟Bruno上新一代公仔箱，真係唔輸蝕畀一班財經演員。
余絲韻