本文重點
內地企業除咗業務趨向國際化，管理方法亦都要國際化，絲絲知道中興通訊（00763）喺○七年為員工推出首期股權激勵計劃，直到最近部分股份可以兌現，估計有九名高管可以攞到過百萬元嘅「大利是」，若今次首批解禁股份全數兌現，涉資約四點八億元人民幣。
表現唔好冇得套現
從第一期股權激勵計劃中可知，中興通訊好重視科研，因為參與計劃人數高達三千二百七十四人，當中六成以上係研發人員，仲會由○九年開始直至二○一一年，激勵股份可以按年解禁。
講明係「股權激勵計劃」，當然係有好表現先可以有回報，喺三千二百七十四人當中，有九位員工因為表現唔好，唔可以套現股份，故實際可以有真金白銀入袋嘅員工有三千二百六十五人，估計可沽售股份數目約為一千五百二十六萬股Ａ股。
余絲韻