本文重點
有啲股壇名嘴成日話散戶唔生性，話佢哋投資唔做功課，一味靠估同埋炒「冧巴」。不過睇怕佢哋遲吓唔使咁勞氣，皆因花旗香港做嘅一項調查顯示，依家年輕一代好重視理財觀念，超過60%受訪者話會自己分析完先投資。
花旗就香港中學生理財態度做咗個調查，訪問咗1,700個來自超過100間中學嘅學生，結果發現啲學生唔係「小兒科」，超過九成同學認為，理財教育應該喺幼稚園至中學階段進行；超過一半同學話理財係為咗未來計劃做準備，同埋令財富增值。
70%中學生識趁低吸
仲有近70%學生話，依家市況波動都可以係入市良機，最好趁低吸納，並作短線或長期持有。雖然呢個心態真係就連炒「冧巴」嘅阿叔都係咁諗，問題係點先叫「低」，但係年紀小小開始就為將來綢繆，都值得一讚。
近期興起「金句」熱潮，「以眼觀察，以腦分析，以心學習」呢句被花旗選出攞咗金句獎，由學生諗出嚟嘅呢句，大家又點睇？
余絲韻