親巡物美各部門

趙丹陽同股神食晏時所推薦嘅北京物美（08277），公司董事長吳堅忠就話趙丹陽為人好務實，佢如果要買公路股就會去數吓車流量，買港口股就會去數貨櫃，所以早排佢對物美有興趣，除睇咗好多關於物美嘅資料外，仲親自走去物美好多次，巡佢哋嘅大賣場不特止，連佢哋嘅物流基地同埋連鎖系統運轉情況等都考察埋，先放心增持物美股票。

做晒資料搜集後，佢至同股神食飯，當然唔放過機會，大力咁向股神推介物美啦！就係咁，物美股價喺趙丹陽食完餐晏之後連續升咗4日，佢仲喺一個星期內帳面狂賺咗成億人仔，令佢喺全球金融危機之時，創咗狂賺超過五成嘅投資奇迹。絲絲覺得呢餐天價嘅晏仔認真食得過，事關都只係佔佢賺到嘅一成幾啫，不過講句公道說話，趙丹陽對投資咁認真，抵佢賺到盆滿缽滿嘅。

余絲韻