區偉賢：不求贏取掌聲

其中現居於英國嘅首任主席區偉賢話，從未諗過香港市場喺發展規模上會有今日嘅成就，佢仲話作為監管者唔應該期望贏取別人嘅掌聲或感謝，相信想入證監做嘅人要有心理準備。至於第二任主席羅德滔，原來佢依家主要打理喺墨爾本嘅葡萄園，真係羨慕死絲絲；至於梁定邦及沈聯濤，絲絲見到佢哋嘅近照，發覺兩人都keep得好好，應該都係偷得浮生半日閒嗰隻啦。

韋奕禮賺多雞碎做餐死

年輕生力軍方面，絲絲比較留意唯一嘅男士，佢就係外事科務經理江卓嵐，事關佢以前做過財經記者，絲絲以前都不時會見到佢，覺得佢做嘢好有幹勁，加上見到佢嘅分享係「高級管理層定期親自講解機構事宜的文化，是我最欣賞的地方」，絲絲相信佢嘅前途一定似錦。

講番大家一向關心嘅，就係行政總裁韋奕禮舊年嘅收入，原來只係微升0.5%至822萬元，但工作量就大增，因為雷曼事件令證監去年接獲歷來最多嘅10,070宗公眾投訴，其中8,252宗就同雷曼有關。

余絲韻