恒指力撐17,600點，走勢未有顯著轉差，一旦此水平失守，下一支持位在萬七關。古勝未睇淡後市，即使本地魚缸在七月份未能延續升勢，需要進行調整，缸邊友早有心理準備。估計呢個月在唔少芬佬放暑假下，魚缸將表現呆滯，但斷估唔會展開大屠殺。

大笨象（00005）跟祖國移動（00941）午後跌幅收窄，分別跌0.9%及1%。港交所（00388）跌幅收窄至0.3%，不過股價一日唔上番120元，本地魚缸亦唔慌有運行。本地地主跟紅色地主繼續插水，尤其紅色地主前仆後繼，皆因繼杭州後，北京、上海的錢莊也開始收緊第二套房貸，紅色地主全線仆直，跌幅由1%至超過5%。

吹水報告唱好個股

雖然呢幾日魚缸插水，但唔少個股吹水報告都係唱好，「小魔怪」 將中遠控股（01919）大幅調高233%目標價至10元，但未能刺激中遠股價逆流而上，股價跌3.2%。「你戇」指華創（00291）穩居一線品牌，給予「買入」評級，目標價為20.15元。

華創昨勁升5.3%，高收16.1元登上成分股升幅冠軍寶座。「小魔怪」做好心一不離二，二不離三，除咗中遠被大幅調高目標價外，「小魔怪」亦調高紅色三保目標價。至於二奶電話（00762）漠視跌市，連升兩日，多得「高佬盛」調高其目標價超過一成。

品牌效應在祖國有幾大威力，看官可以從霸王集團（01338）呢幾年的高速增長睇得見。自從霸王狂谷廣告，並邀得國際巨星大哥大做代言人，其銷量以幾何級數增加，爆炸力驚人，一登陸本地魚缸，即吸引大量捧場客。其實蒙牛（02319）、雨潤（01068）、李寧（02331）及百年老牌青啤（00168），都係靠一個超級品牌賺大錢。能夠成功打開祖國市場，成為人所共知的內需品牌，真係商機無限，可以話等於擁有一部印鈔機。

今年業績增長樂觀

統一企業（00220）雖然屬過江龍，但卻能跟土炮康師傅（00322）齊齊壟斷祖國飲品及即食麵市場，統一的品牌效應亦甚具威力。集團○八年全年盈利為3.44億元人仔，雖較○七年減少18.91%，主要因為匯兌虧損達1.51億元，其核心業務表現仍然理想，今年首季盈利為3,422萬美元，較去年同期增長2.5倍。踏入炎夏季，市場對飲料需求激增，預料第二季成績表將繼續做好。

統一○八年營業額接近100億元，毛利率亦擴闊至34.1%。由於去年的虧損唔係經常性，加上食品原材料價格回落，相信統一今年份成績表會好靚仔。統一財政穩健，負債率低，手頭茄薯高達30億元人仔，股價在4元附近整固，小圓底收集完成，料再展升浪，值得留意。

古勝