本文重點
361度（01361）尋日掛牌上市，絲絲去捧場，除咗見到361度總裁丁伍號外，仲有恒安（01044）副主席許連捷，原來佢係丁伍號好朋友兼同鄉，所以專誠來港捧場。據聞安踏（02020）、特步（01368）都係鄉里，唔知佢哋會唔會搞個上市公司福建同鄉會呢？
紫砂茶壺贈港交所
新股掛牌，自然唔少得送禮畀港交所（00388），361度好有心思，送咗個北京鳥巢形狀嘅紫砂茶壺，由於佢哋來自福建，所以今次嘅禮物係福建最有名嘅特產紫砂茶壺。
由最初嘅上市前宣傳，到依家正式上埋市，361度好識得搞噱頭，為咗提高公司產品知名度，佢哋上市前搞咗個舊換新送波鞋大會，當日送出361對波鞋，又搵明星古巨基同Angelababy設計波鞋；之後喺投資者推介會請咗模特兒同港男着上公司嘅運動衫同波鞋，引起投資者注意。仲有，招股定價係3.61元，上市編號係1361，咁容易記，難怪公司名深入民心！
余絲韻