考慮期權獎勵管理層

陳總抖咗啖大氣，好誠懇咁繼續對絲絲講，話最恐懼係因為當時都唔知發生乜嘢事，畀人問起想解釋都解釋唔到，仲要面對數以萬計嘅員工、已經成為老友嘅供應商同埋銀行，大家都要生存，要對佢哋負責，如果處理得唔好，都唔知國美同呢一班人以後點樣喺社會上立足，當時壓力真係好大，亦都好迷惘。

好彩佢發現唔係自己一個人孤軍作戰，事關佢哋成個管理團隊都喺度撐住，事件發生到依家7個月，國美幾乎已經走出咗陰影，佢發覺原來畀多啲管理層參與決策，只會令公司愈走愈好。當然喺同度患難之後，公司都唔會虧待佢哋，家陣仲研究緊一啲期權獎勵計劃添，希望班管理層對於自己有份參與管理嘅公司更加有歸屬感喎。

陳總仲話好耐都無放過假，依家一身鬆晒，可以計劃請兩日假休息一下。絲絲心諗，兩日假點夠休息，至少都要兩個星期啦！唔怪得陳總可以做主席，絲絲就唔得啦。

余絲韻