在近期的升市中，港交所（00388）可以話係表現最好的一隻重磅股，股價由上周二低位113元水平，短短數日飆升12.1%，上周五收報126.7元。由於近日市場掀起新股熱潮，多隻新股輪流排隊上市，無疑會改善港交所今年張成績表。之但係，深明股市之道的股友們，相信都好明白熱潮好容易變成過眼雲煙，所以新股熱潮一過，慎防股價升得過急的港交所會有沽壓。
市傳工商銀行（01398）計劃洽購永亨銀行（00302），即使兩者都否認有關消息，惟永亨收市仍飆升一成以上。不過，小尾想提醒一下跟炒的投資者，事關招商銀行（03968）舊年以「超高價」全購永隆後，已傳出阿爺嗰邊嫌買得貴，唔係太想再見到類似交易，永亨現價PB超過兩倍，估值唔算平，加上工行早已有工銀亞洲（00349）作為本地業務的旗艦，買入永亨效益有限，故現價高追，風險唔低。
（小尾）