「3M先生」：「大健，上次講咁多嘢你聽，一句都無寫，我今次封嘴。」

大健：「唔好嬲喇，點睇後市呀？七月個市會點？」

「3M先生」：「睇淡，調整市，但又淡唔晒，有『自由行』無失拖。恒指好『硬頸』，三頂頸線可守到，即萬六點左右。」

「訓導主任」（任小姐）：「我都認同國慶前個市唔會差，仲有炒股最緊要話做就做，唔好猶豫，最多咪止蝕。」

「3M先生」：「係！最忌議而不行。大健，你問吓我哋嘅『一樓分析員』啦。」

「掂到萬九請食鮑魚」

「一樓分析員」（胡先生）：「如果今年六月二十九日或之前，恒指曾經掂到萬九點，我都請大家食鮑魚。」

大健：「我都覺得上唔到萬九點。」

「3M先生」：「大健，咁你睇錯都要請埋一份呀。介紹你識，呢位係神奇女俠Judy，炒隻『一全三』（中國忠旺，編號01333）賺唔少錢。」

大健：「你又點睇七月港股呢？」

「神奇女俠」（Judy）：「股市變化又大又快，莫講一個月，一星期都答唔到你。但係睇市要多方面配合，睇港匯、外圍市況，好似近排逢美元下跌，金屬資源就升，股市一齊升。依家我仲會睇埋牛熊證街貨，研究大戶要點樣殺倉。」

大健：「呢排有無心水股？」

「神奇女俠」：「近排最鍾意隻中海發展（01138）。另外我睇好金價半年內上番每安士1,000美元唔難。」

大健：「似乎你今年搵唔少喎？」

「神奇女俠」：「今年總算追番海嘯時嘅損失。我一向炒股唔炒市，最緊要揀優質股，買股先要計算隻股最少值幾錢，預算風險，買咗唔升就放喺度等下一個浪。」