「樂壇MJ」喺我心中有三樣嘢印象深刻，佢嘅「Moon walk」真係令人如癡如醉；另外係睇佢演唱會嘅現場觀眾總係如此歇斯底里；最後就係一首《We are the world》。我唔係MJ嘅「粉絲」，佢嘅生平、點滴、事迹、影響都唔到我去寫，我只想講聲「再會MJ！」

近四年七月份皆升市

「股壇MJ」慢慢被我哋忘記，「Market Jitters」亦好似已經遠去。依家問你○八年十月二十七日發生乜嘢事仲記唔記得？話說當時因為「金融海嘯」，恒指最低跌到10,676點。再嚟多個，咁今年三月九日又點呢？當時「香港獅王」滙控（00005）受供股消息影響，股價最低跌到33蚊。當然你可以話呢啲景象只係大戶操控，其實股價跌到唔合理水平，往往係因為市場恐慌，「股壇MJ」作怪。

恒指去年底收報14,387點，到上周收市報18,600點，累升4,212點或29.28%。今個月恒指升咗2.36%。上周一度跌到17,484點，估唔到話咁快又起番身，上周恒指升3.79%，收復20天平均線。

今次《東方產經》網上民意調查，睇吓股友上半年股票投資成績如何？ 截至上周末晚上6時，有36%人話賺三成以上，21%人就話賺三成或以下，蝕錢同打和嘅分別有28%和11%，有4%就無買股票。

股壇智慧「五窮、六絕、七翻身」，今年唔多聽見股友提起。咁又係，今年「五不窮、六不絕」，咁七月又會點呢？過去十年嘅七月份港股表現係六升四跌，對上四年都係升市。

唱好經濟復甦股市升溫

依家港股市盈率大約16倍，已離開恐慌水平，股友入市氣氛不斷升溫。美國上周維持息口不變，議息聲明仲話經濟有復甦迹象，更加令股友放心買貨。同時瑞信上周出咗個新興市場季度研究報告，將今年亞洲新興市場經濟預測調高0.3個百分點到4.7%，明年經濟增長仲調高0.6個百分點到7.3%；中國今年有望「保八」，明年經濟增長預測就由8.5%調高至9%。

經濟前景自然有專家分析，我比較擔心係「股壇MJ」學似「球壇MJ」，即係NBA球王米高佐敦。喺我心目中，「球壇MJ」嘅經歷啟發咗我一樣嘢，仲成日同人分享。

怕似球壇MJ「I'm back」

「球壇MJ」喺九三年連贏3次NBA總冠軍後決定退休，仲轉做棒球員，原來佢最鍾意嘅運動其實係棒球，加上想完成爸爸心願，可惜「球壇MJ」打棒球水皮到你唔信。人生就係咁無奈，你最鍾意嘅事未必做得叻，你最叻嘅事又未必最鍾意。喺九五年，佢決定重返NBA，喺記者會上講出經典金句「I'm back」（我回來），之後再喺九六至九八年連贏多3次總冠軍。唔知你怕唔怕「股壇MJ」同你講I'm back呢？

其實「樂壇MJ」同「球壇MJ」都好有淵源，大約喺九二年「樂壇MJ」搵咗「球壇MJ」為佢首名曲《Jam》拍MV，佢哋仲互相教對方跳舞同打籃球，個MV同拍攝花絮可以喺YouTube搵到，我認為段花絮好睇好多。

（大健）

若然有料想報畀大健或有嘢問，可電郵money.biz@opg.com.hk