花旗魚缸上周五個別發展，道指連續第二個星期下跌，但納指則扭轉跌勢。今個星期有唔少經濟數據公布，加上只有四個交易日，花旗魚缸或較波動。至於在花旗掛牌的ADR亦個別發展，「油魔」唔精神，石油股下跌，大笨象（00005）微升，祖國移動（00941）微跌，似乎對今日本地魚缸表現無乜啟示。

祖國關照港股冇衰

雖然花旗經濟仍在谷底徘徊，但祖國卻有本事在世銀調低全球經濟增長預測之際，獲調高經濟增長預測，相信今年祖國要「保八」唔難，所以吸引全球資金流入祖國市場。至於本地魚缸，因藉住投資者可以透過買入H股作曲線投資祖國企業，亦有一定優勢。即使在半年結及今日期指結算過後，本地魚缸出現調整，幅度相信亦唔會好大。自稱「冒牌股神」的四叔話，在萬六點會入貨，高過二萬點就減持套現，古勝亦甚為認同，當然在萬六水平亦要分段入市，事關花旗魚缸表現太曳的話，會影響投資氣氛，無論祖國或本地魚缸難免被拖累，屆時本地魚缸或進一步下試萬五點。

在投資氣氛好轉下，新丁排住隊登陸本地魚缸，上周霸王（01338）以超額認購480倍的爆燈指數下成為新丁霸王，而另一內需股361度（01361）亦吸引唔少捧場客，影子股乘機炒上。比較同類股份，幾隻紅色波鞋中，以中國動向（03818）的邊際利潤率稱霸，其○八年邊際利潤率達40.1%，毛利率達58.5%，年純利率有41.2%。 反觀361度，截至○九年三月底止九個月的毛利率為32.6%；期內純利率為15%；經營邊際利潤率18.3%，低過中國動向一大截。

銷售未受海嘯打擊

雖然去年全球經濟急轉直下，中國動向○八年份成績表仍錄得94%收入增長，銷售金額達33.2億元（人仔‧下同），盈利上升86%至13.7億元，反映業務未有受到成本急漲以及金融海嘯的打擊。今年首三個月同店銷售增長達6%，而同期總銷售增幅更接近一成，由於在祖國內地，Kappa品牌在年輕人市場佔有一定的位置，因此令其業績能保持增長。至於集團剛購併的東瀛品牌Phenix，目前處於整合階段，相信要再等一兩年份成績表先會反映其貢獻。

中國動向一直係芬佬愛股，「美人林」跟「高佬盛」齊齊睇好，後者指中動向的銷售點較魚缸內其他體育用品股少，銷售空間更具增長潛力。

古勝