有時證券行嘅座位，都可以反映到市況嘅表現。聽某B組行卜架行今年初有唔少卜架直頭成日冇現身，免得食白果，連車錢都蝕埋。直到呢兩、三個月，卜架明顯多咗生意做，電話都接唔切，近月更多咗客人上門造訪，就連櫈都唔夠坐咁話！

散戶炒股仔搵到食

佢仲話，依家卜架行開行埋，話題不離兩個，其一係個市係咪已經見頂，其二係有邊隻細價股好炒。有老卜架慨嘆，股票市場往往係幾平都冇人買，但貴一貴都會有人爭，特別係近月唔少散戶炒股仔搵到食，手上有筆利錢，準備等恒指再衝穿萬九點就追入市，所以唔好過早定論升市見頂！

余絲韻