本文重點
台灣娛樂圈最近出產咗第一位上市公司老闆，佢就係識搞笑又識投資嘅吳宗憲。上星期佢突然接手虧蝕嘅翔昇電子，仲親自上陣做董事長，呢間公司業績麻麻，但係憲哥好有信心，話做生意簡直易過做主持！
接手翔昇要血洗市場
講起呢單令人摸不着頭腦嘅投資，原來係有緣故嘅。查實憲哥早幾年已投資咗一間生產LED燈嘅公司，而翔昇電子正係生產LED上游材料電路板，所以憲哥滿肚計仔，暗示會以低價血洗市場，就好似當年以低於市價八成嘅價格，成功喺LED市場企穩一樣。
佢講到興起，又發揮抵死嘅本色，話喺佢血洗市場嘅策略下，相信無人夠膽同佢鬥平，咁就成功喇，間公司咪會變成呢個行業嘅周杰倫囉！咦？周天王？憲哥口氣都唔細喎！
不過都抵佢咁囂嘅！想當年，其貌不揚嘅周杰倫陪同學參加音樂比賽，佢負責彈鋼琴，做裁判嘅憲哥獨具慧眼發掘咗周董做幕後工作，先至有後來嘅一代天王，大家服未？
余絲韻