港股呢排話炒資金市，究竟外資增持多抑或減持多，睇港交所（00388）六月十九日紀錄則係減持居多，增持較矚目的為兩隻細價股，中能（00228）再獲深圳市人民政府旗下之創新投資於場外增持5,000萬股，每股作價0.7元，持股量由5.29%增至6.94%。而鄭裕彤繼續買新時代（00166），每股平均價0.588元，持股量由7.49%增至7.75%；但新時代近日由0.7元急插至0.55元，不少散戶慕彤叔之名而入貨，現時均叫苦連天。至於彤叔本身隻旗艦新世界發展（00017）則遭瑞銀減持，持股量降至5%以下。
同香港地產股一樣升得咁癲的首推內房股，其中隻富力（02777）買賣最為活躍，先見德銀於六月十七日減持570萬股，持股量降至5%以下；六月十九日有大摩出手增持110萬股，但同日瑞銀大手減持731萬股。內房股近日升勢有餘未盡，惟富力表現卻較為呆滯，莫非與大行減持有關？
富力一向被視為負債過高之內房股，不過上月尾竟然用17.7億元人民幣連購北京同廣州兩幅地，以行動展示本身財政冇問題。間公司有恃無恐，主要係估計今年賣樓可回籠100億元現金，另外又可以發債集資幾十億元，必要時發埋A股，咁就一天都光晒！而好多內房股已趁市旺批股集資。不過，內房股升咗咁多，好多外資嘅態度已轉趨審慎，部分更將富力之投資評級調低至「沽售」。
戴子彪