唔少人鑽研財經占星學（Financial Astrology），睇吓天體運行對金融市場嘅影響，佢哋首先利用出生日期，幫上市公司、美國總統奧巴馬等開個星座命盤。無錯，原來凡事都有生日，公司嘅生日就係公司成立日（Incorporation Date），但上市公司仲有另一個重要日子，就係首次公開招股日（IPO Date），前者開嘅命盤睇上市公司嘅「命運」，後者就睇股價表現。

Baby一向唔信雜誌登嘅星座運程，但唔知點解每次都會睇㗎噃。最近多隻新股招股，都唔知抽邊隻好，如果用首次公開招股日嚟斷定星座嘅話，361度（01361）係雙子座，霸王（01338）係巨蟹座。處女座嘅Baby同雙子座無乜緣分，但同巨蟹座就幾夾噃。以上推斷只根據星座，因為財經占星學對於我嚟講太過複雜。

美股下月底跳崖下插？

有人從占星角度，預測六月二十二至二十三日（今、明兩日）美股表現波動，但未致於大幅調整，呢個夏天，最快七月底先會出現「跳崖」式下跌。而奧巴馬星座命盤顯示，七月、九月同十月火星比較活躍，可能引發一啲騷動。

七月二十二日係占星、天文發燒友嘅大日子，因為當日會出現日全食，中國部分地區上空會觀賞到，香港就只能睇到日偏食。「天狗食日」對A股唔知係咪大凶之兆呢？（以上內容非精密科學）

（Baby）