上周恒指屢次喺18,000點關口掙扎，跌穿又收復嘅情景多次出現，但上周四始終要喺萬八點樓下收市。上周五港股高見18,015點又急回，最終上周收報17,920點，一周大跌968點或5.13%，一周高、低位分別係18,872點和17,655點。

恒指上唔番19,161點高位，仲跌穿上次17,710點嘅低位。最近3個交易日恒指收低於20天平均線，係三月中開始升浪以嚟嘅第一次，但守住三月中升浪建立嘅上升軌。

散戶低撈Call輪牛證？

好奇怪，市升時股友鍾意睇淡，市跌時股友又要睇好。上周首4個交易日分別有7,725萬元和1.83億元資金淨流入恒指Call輪同恒指牛證，相反恒指Put輪同恒指熊證分別有6,659萬元和1.51億元資金淨流出，即係做好倉，平淡倉。不過法興衍生工具策略師蔡秀虹（Eva）話，上周五轉為買熊證同Put輪為多，仲叫大家留意內銀股相關Call輪，特別係建行（00939）、工行（01398）同中行（03988）。

睇埋恒指牛熊證街貨分布，截到上周四收市，恒指牛證共有街貨17.33億份，相等於揸咗約2,650張期指，同時恒指熊證街貨只有13.33億份，相當於沽咗約1,784張期指。最重倉位係收回價介乎17,200至17,599點嘅牛證，有8.47億份街貨，等於揸咗1,382張期貨。

半數人擔心出現大調整

港股後市關鍵係半年結嘅Window dressing（粉飾櫥窗）以及六月期指結算係人都知，加埋本周三美國議息都會實，但後市會點，股友真係眾說紛紜。

先睇今次《東方產經》網上民意調查，問大家是否擔心港股正醞釀一次較大型調整，截至上周末晚上6時，結果48.7%人話擔心，但另外51.3%人就唔擔心會出現大型調整。

上周喺大福證券觀塘分行遇到相熟股友，佢哋話：「攞支筆出嚟抄低。港股喺臨近期指結算就會抽番上嚟，原因係港股半年結，更重要係資金仲未流出港股，本周恒指隨時重上19,000點。係咁多，唔好再問。」

不過，大福證券觀塘分行經理陳傑偉就覺得，臨近結算調整隨時出現，睇嚟七月都係炒落，佢仲話：「依家開始要小心，正所謂升得急，跌得快。」

走多兩步，去埋天行聯合證券觀塘分行攞料，駐場經理吳家邦話：「港股回調，股友開始收斂，獲利沽貨居多，但係每當恒指由跌轉升，又會引到股友追貨。我覺得恒指喺19,000點阻力重重，但個市要升就唔可以同個市作對，總之萬八點樓上要小心做咗大戶點心。」

新股細細粒或有驚喜

恒指回落到現水平，搞到股友心情好似行鋼線走到半路，返轉頭前功盡廢，捱埋餘下路程又唔容易。致富證券研究部經理莊志豪完全體會到呢個處境，佢話：「思想上我估個市係要跌，但諗到人人看淡，可能大市會再挾上多一次，隨時再創新高見19,800點都唔奇，加上半年結無理由唔捱埋佢，但應該唔會升見20,000點。」

呢個時候，我想攞番隻《Man on Wire》嘅DVD出嚟睇。呢套奧斯卡最佳紀錄片係講法國人Philippe Petit喺七四年八月七日於紐約世貿中心雙子塔行鋼線嘅驚人事迹，希望可以得到啲啟示。

第一上海證券市場策略員葉尚志話：「股友要自求多福，你睇細價股都收斂咗，前排單日升15%以上嘅股份每日有三、四十隻，近排得番十隻左右。揀股時必須係有國策支持和概念強嘅股份，如海爾電器（01169）和東風汽車（00489）等。」

目前市況下，新股或者係出路，雖然呢批新股分量有限，但細細粒或者更易炒起，畀個意外驚喜你。邊隻新股會爆升我唔敢估，但最爆笑新股相信都係本周四截止招股嘅霸王國際（01338）。喺《討論區》見到網友話：「用一個星期左右覺得好瞓咗，白頭髮的確少咗，同埋脫髮情況有改善。唯一唔好是有中藥味，用咗亦無『動L』感覺。」乜嘢叫「動L」？只能意會，不能言喻。

（大健）

若然有料想報畀大健或有嘢問，可電郵money.biz@opg.com.hk