其實花旗魚缸的上升動力，早於之前一星期已減弱，加上聯儲局舉行議息會議，今個星期又有幾項重要數據，包括個人收入與支出數據，以及預售屋銷售量等，仲有華府拍賣1,040億美元國債，若然有乜冬瓜豆腐，花旗魚缸或借勢繼續向下調整。不過，本地魚缸在ADR的表現又唔係曳，幾件重磅股普遍上升，今日本地魚缸應該唔會太差。不過現貨場成交額持續縮水，萬八點又失守，加上逼近期貨場結算，花旗魚缸借勢下調的話，本地魚缸亦難逃一跌。

上周紅色錢莊表現出色，幾次本地魚缸插水，都係由紅色錢莊股帶動收復失地。不過值得留意係，沉靜咗一輪的空軍，忽然大舉向建行（00939）投擲超過8億元沽空銀彈，超過其周五總成交額的一成，港交所（00388）亦在只有8億元總成交額下，錄得1.8億元的沽空金額，唔排除大戶另有圖謀，為後市作部署。

紅色電訊股有得炒

錢莊股經過上周強勢，今個星期唔排除要抖抖，紅色地主同本地地主在花旗聯儲局議息前，亦難有作為。「油魔」唔精神，油股同樣無運行，數嚟數去得番電訊股有得諗諗。今個星期，三個紅色電話將公布最新營運數據，若然二奶電話（00762）同祖國電信（00728）的上客數字有突破，反映搶佔3G市場有成績的話，兩股可能炒番轉，看官不妨留意。

煤炭股呆咗幾日，似乎漸漸搵到支持。根據港交所（00388）資料顯示，「小魔怪」近日似乎對煤炭股情有獨鍾，基金分別於六月十日及十一日，以每股平均價9.97元買入737萬股中煤能源（01898），及以每股平均價11.23元增持703萬股兗州煤業（01171）。之前煤電糾紛一直困擾着煤炭企業，但兗煤近日已經證實，煤電企業已就合同煤價上調幅度達成協議，相信可消除煤企的不明朗因素，加上「小魔怪」亦作出增持，值得留意。

受惠煤炭需求反彈

兗煤日前表示，已簽訂○九年度祖國煤炭銷售合同784萬噸，平均含稅基準價為每噸人民幣502.62元，其中重點電煤銷售合同429萬噸，平均含稅基準價為每噸463.86元，比○八年增加4%。有大行認為已有迹象顯示，需求正在反彈，更重要是隨着本地魚缸的ETF將登陸祖國魚缸，兗煤H股可望受惠於AH股差價的縮窄。而祖國加快基建項目上馬速度，祖國鋼材生產增加，提升冶金用煤需求，對兗煤有利，「花旗邦」更將兗煤的投資評級調高至買入，目標價為14元。既然有大行睇好，古勝認為跟得過。

古勝