港股繼續牛皮偏軟，大價股發軟蹄，早前熱炒嘅細價股又繼續抖氣，迫使炒家繼續停留喺新股。昨日旭光（00067）來個鯉魚翻身，曾高見2.57元，收報2.52元，升11.5%，成交5.17億元。
嚟緊仲有幾隻新股登場，相信短期仍會係市場焦點。不過，小尾覺得若然炒埋呢批新股，大市尚未能向上突破，話唔定次季以來嘅股市升浪真係告一段落。若然如此，炒家們可能要諗定有咩「抖暑」好去處。
除咗新股之外，尋日市場另一焦點，乃被美資主要股東UTC提全購嘅海灣控股（00416）復牌，原來全購建議已獲得中國商務部批准，股價裂口高開，收報3.29元，升16%。查實去年底UTC向海灣提出全購嘅價格係每股3.38元，但其後海灣股價一直企喺2.6-2.8元水平，折讓主要反映可能會步早前可口可樂擬全購滙源果汁（01886）建議泡湯嘅後塵，即交易未必過得到中國反壟斷法呢一關。誰知今次海灣竟然順利「過骨」，捧場者「獎金」豐厚，亦贏得特別開心！
（小尾）