本文重點
時光飛逝，一年一度嘅股神巴菲特慈善午餐拍賣會又嚟喇，今年要同股神同枱食飯嘅底價為二萬五千美元（約十九萬五千港元），受益人依然係專幫低下階層食物和醫療嘅格萊德基金會。拍賣日期定於本月二十一至二十六日，面對金融海嘯，各界均注視今年股神慈善午餐拍賣價，能否打破去年由中國「赤子之心中國基金」趙丹陽支付嘅210萬美元紀錄！
可帶7位朋友共膳
一如過往，有興趣參加股神慈善午餐拍賣嘅人士，可以直接上www.glidelunchwithwarrenbuffett.com進行競投，成功競投者可以帶埋七位朋友，齊齊到紐約嘅史密斯沃倫斯凱餐廳與股神共進午膳，詳談世界大事及經濟大環境。呢間餐廳大有名堂，被《紐約時報》稱為「解決任何糾紛嘅牛扒店」，出名喜愛吃牛扒嘅巴菲特，自然選擇喺呢度一邊食牛扒，一邊做善事。
余絲韻