本文重點
恒生銀行（00011）陳國威過檔新地（00016）之後，財務主管個位懸空咗一陣，尋日恒生終於宣布新人選，七月二日起，中銀香港（02388）嘅梁永樂（洋名Andrew）將出任恒生副總經理兼財務主管，Andrew係恒生嘅舊部，做咗差唔多10年，3年前至離開恒生，引證咗恒生常務董事潘仲賢日前話「都算係外面請返嚟」嘅玄機。
曾任職恒生近十載
講番Andrew，佢畢業於港大嘅社會科學學系，主修管理學，最初喺四大之一嘅會計師事務所開始佢嘅事業，之後仲做過港交所（00388）上市科同埋兩間外資銀行。
佢喺九七年加盟恒生，做過高級經理兼財務副主管、企業銀行高級經理同埋高級經理兼中國業務副主管，○六年離開恒生後就去咗恒隆，依家佢係中銀香港財務管理副總經理。
絲絲聽講中銀香港喺業績會後，會搵啲同事細心解釋份財務報告畀傳媒朋友聽，解答佢哋唔明嘅地方，Andrew就係當中嘅一分子。
余絲韻