本文重點
本港窩輪及牛熊證市場競爭激烈人人都知，發行商都話生意難做，但如果做得出色，換個角度咪即係大把跳槽機會囉。
最近又有新一宗「輪場」人事變動，市傳麥格理資本證券認股證銷售主管陳其志（Keith）將離開做咗3年嘅崗位，喺九月中加盟滙豐，管理窩輪及牛熊證業務。
先過冷河九月履新
據知Keith近幾個月係過冷河期，到九月中先會到滙豐返工，相信係接替上月初轉投巴克萊出任亞太區股票衍生工具推廣主管嘅黃紹良（Frank）留低嘅空缺。絲絲打電話去麥格理得知Keith本周中已無返工，睇嚟放假期間Keith可以抽多啲時間陪佢8個月大嘅囝囝，享吓天倫樂。
Keith喺○六年加入麥格理，一直負責窩輪和牛熊證銷售工作，佢跳槽即係話又到麥格理出現空缺，勢將有新人事變動。其實依家「輪場」工作機會真係唔少，據知渣打同摩根大通都喺市場搵緊主管窩輪業務嘅人才。
余絲韻