隔晚道指又跌過百點，港股當然唔精神，恒指一開市已經喺18,000點樓下，低見17,833點，但晏晝滬綜指顯著上升1.23%，帶動港股午後顯著反彈，恒指一度倒升，但高位承接力始終唔夠，埋單都要跌80點，以18,084點收市。
尋日朝內地汽車股走勢都係一般，但市場傳出有多宗行業購併的消息，包括東汽（00489）會入股台灣裕隆中國附屬兩成權益，另內地媒體指吉利（00175）已就收購沃爾沃與福特汽車達成初步意向，華晨（01114）又話與一汽重組。雖然有關消息是否屬實仍屬未知之數，但以汽車股昨日走勢及成交來看，升勢應該未盡。
內地股市尋日回升，主要由地產股帶動，而內房股昨日亦跟隨做好，方興地產（00817）急升逾8%，深圳控股（00604）及富力（02777）升5.11%及3.9%。市場一直憧憬內地樓市已見底，而大市近日即使調整，內房股調整幅度相對有限，強勢盡現，小尾認為只要有利好新消息配合，內房股絕對有力再試高位。
（小尾）