內地私募基金在○七年曾經風光，一時無兩，當時個市升到㷫合合，好多公募基金經理都轉行去做私募，貪佢無太多規條管住，可以用自己錢炒埋一份之餘，佣金收入亦是普通基金公司的幾倍。雖然舊年金融海嘯的大浪，令私募被打沉咗一段時日，不過近排又重新復活，還吸引一班業界精英爭相効力。

華爾街精英也投効

老友講，內地私募行規一般會提取客戶盈利的兩成作為報酬，有人計過條數，行內一個明星公募基金經理淨計今年頭五個月，已經有過千萬落袋，難怪本港金融圈中都有不少人心動啦。聽講就連曾經入選美國交易員雜誌「全球百位頂尖交易員」的華爾街精英，最近都去咗上海，籌備成立私募產品。

不過老友話現時內地私募界良莠不齊，不但有好多投資界明星加入，同時亦有不少新手渾水摸魚，加上市場監管並不完善，投資者最好都係小心為上。

金占士