本文重點
唔少企業都好鍾意組織員工做義工，可以聯誼吓增進員工感情之餘，仲可以服務社會，提升形象。好似紐約梅隆銀行，佢哋為慶祝銀行成立二百二十五周年，上個星期開始就動員全球唔同地區嘅員工，身體力行一齊做義工，至於香港方面，佢哋就去咗十字路口基金會做義工。
參與「十字路口」活動
十字路口基金會係一個喺香港成立嘅非牟利機構，主要幫手將香港嘅廢棄物分派畀全球或者本地有需要幫助嘅人，今次紐約梅隆銀行嘅義工團分成好多個小組，進行衣服、家具、電子產品等嘅物資處理，以及室內翻新同埋油漆等工作。
義務工作可以幫到人之餘，亦都幫到自己，令生活過得更充實，工餘時候做啲有益身心嘅嘢，工作時自然會更加得心應手。
另外，紐約梅隆銀行早前證實，已經獲准回購由美國政府去年十月通過嘅「問題資產救助計劃」（ＴＡＲＰ）注資所購買嘅優先股。
余絲韻