廣東人鍾意數目字「8」，因為諧音係發達個「發」，相信大家同絲絲一樣都想發達唔使做。最近創業板股份弘海（08112）轉主板，有咁多冧巴揀，但佢哋偏偏揀咗個「65」，一反傳統無揀到「8」字冧巴，點解佢哋咁與眾不同？
聽朋友講，其實弘海一班管理層可以揀嘅冧巴相當多，當中不乏「發」字靚號碼，但去到最後階段，佢哋手上揸咗3個冧巴慢慢揀，3個都無「8」字，包括係「65」、「72」同埋「90」，聽講係因為細冧巴買少見少。最後佢哋終於揀咗「65」，係因為公司一眾管理層都係生於60年代，對「6」字有種情意結，認真懷舊。
「65」上手紀錄良好
佢哋又話「65」過往紀錄良好，上一手間公司係私有化除牌，而另外嗰兩個冧巴都係長期停牌後被迫除牌。講開「65」，上手咪就係盈科保險，當年被富通收購之後，繼而進行私有化。
余絲韻