本文重點
唔講真係唔知，原來新任華創（00291）副董事總經理兼首席財務官黎汝雄好叻整嘢食，佢同絲絲講，曾幾何時佢仲去過皇朝會學整鮑參翅肚添。法蘭克（黎之洋名）話，好可惜嗰次學完後，由於忙得滯，一直都無乜點整過，依家都忘記得七七八八囉！反而佢平時會keep起教煮嘢食嗰啲雜誌專欄，得閒放假返澳洲屋企就煮番兩味畀老婆食。今時今日咁好嘅老公仲去邊度搵呀，絲絲都戥黎太開心。
提子搣皮去核被俘虜
咁究竟法蘭克係咪用呢一招氹到太太同佢結婚呢？佢話反而唔係囉，當年太太只係佢朋友時，有次一齊去食飯，飯後餐廳送上提子，太太好細心咁搣咗啲皮，仲挑埋粒核整咗成碟，佢當時心諗呢個女仔食嘢習慣都幾得意喎，估唔到原來成碟都係搣畀佢食，食完嗰碟提子之後，呢個女仔就俘虜咗法蘭克，無幾耐仲做埋佢太太添。
哇！好浪漫呀，絲絲都要學吓呢招嚟冧吓男友先。
法蘭克仲話，佢之前喺華潤微電子時長居無錫，有助手又有司機，基本上好多嘢都由助手安排好晒，自己淨係專心工作就得啦，但次次放假返到澳洲屋企，老婆總會叫佢整吓水喉、電燈，好多家務要搞，反而辛苦過喺無錫返工。
但絲絲留意到，法蘭克講呢句時係充滿幸福笑容，唔係佢點會有5個仔女咁多呀，真係羨慕死人！
余絲韻