港股已連跌三日，過去兩日恒指雖然力守18,000點，但氣勢明顯轉弱，雖然有個別股份借消息炒上，但氣氛完全走晒樣。昨日雖然有唔少股仔由低位反彈，可惜力度麻麻，市場追貨意欲又不高，都幾難搞。
雖說好多股仔只是一般，惟第一視頻（00082）表現又幾突出。集團早前成為黑龍江省的手機購彩推廣商，手機購彩其實係用戶可透過手機落注購買彩票，而第一視頻則負責推廣並收取服務費，據聞是項投資正正是投入少收入高，集團更預期今年新業務可佔去六成營業額，難怪第一視頻近日股價走勢氣勢旺盛。
新業務吸引，亦得到基金大戶注意，上周便有基金OZ要求批股，以每股0.55元接咗1.44億股新股，批股後未見沽壓，昨日跌市更再度突破，完全漠視當前大市跌勢，咁強勁嘅走勢，古晨認為可搭轉順風車，暫時先睇0.9元，止蝕位就放在0.66元。
古晨