恒指上周五最高升見19,161點，終於重上萬九點水平，但頂唔到收市，最終收報18,889點，一周升210點或1.12%。你睇吓個恒指走勢圖，50天平均線同250天平均線喺去年三月十九日出現「死亡交叉」後，最近兩條線又再走近，睇情況「黃金交叉」快將出現。

僅45%股友擬抽新股

幾多利好同利淡因素都好，市況最終由「資金」同「氣氛」決定。據「輪場西門」話，上周五接番唔少投資者沽出嘅Call輪同牛證，象徵散戶認為升勢差唔多，但佢話唔知點解往往散戶都係睇錯，如果信呢個理論，你知點做啦！

市旺咗，炒股嘅人都多番。上星期去耀才證券探股友，場中人數比「世紀供股」時最少多咗三分之一。耀才證券總經理陳啟峰話：「市旺自然多人，當中唔少係新客，或者同最近有免佣優惠有關。」但新股反應似乎麻麻，今次《東方產經》網上民意調查問股友，多隻新股排隊於本月招股，你會參與抽新股嗎？截至上周末晚上6時，44.7%人話有計劃抽新股，有47.4%人就話唔會，仲有7.9%人未有決定。

港股升到呢個水平，唔少股友已經入市，但都係且戰且退嗰種，有微利即走，好怕接火棒。其實依家係咪應該入貨，好睇你係邊種人，有人話升市無貨喺手好蝕底，但更多人怕呢頭買嗰頭跌。踏入雨季，你寧願「落雨無帶遮」定「帶遮無雨落」呢？希望呢個問題可以令你了解自己喺「升市無揸貨」同「跌市成手貨」之中怕邊樣多啲。

值唔值追睇你點演繹

畀多個問題你諗，假設有條村莊爆發疫症預計會殺死600人，你會選擇以下邊個應變措施呢？措施A係可以救活200人；措施B係有三分之一機會全部600人救活。研究話大多數人都揀措施A。如果變成咁你又點揀呢？措施C會令400人死亡；措施D就有三分之一機會無人死亡，但有三分之二機會全部600人死亡。研究又話今次啲人通常都會揀措施D。

用統計學概念分析，以上4個措施嘅預期結果都一樣係200人獲救並有400人死亡。但當演繹角度唔同就會影響人嘅決定，以上就係行為金融學（Behavioural Finance）其中一個理論。

所以依家買貨與否，往往視乎你對大市嘅演繹。如果你估上望水位有限，自然怕「跌市成手貨」，但如果你覺得仲可以有大把升幅，當然擔心「升市無揸貨」。

高風險唔係人人啱玩

上周皇家馬德里總共使咗1.48億歐元收購卡卡同「C朗」，皇馬新任會長皮里茲話過打算用3億歐元收購球員，經濟不景仲有咁多錢「投資」，恨死唔少CEO。正所謂「花得起都要懂得花」，高價買球員想改善球賽成績，更想創造到金錢收益，皇馬敢用天價收購，自然計過潛在超高收益。據德勤嘅Football Money League報告，皇馬喺○七至○八年度球季收入有3.66億歐元，係全球最賺錢球會，難怪咁多錢使。由此可見，「高風險高回報」投資唔係人人啱玩，正如炒股時都要問自己係咪承擔得起風險，講緊係包括你嘅銀包同心臟。

上星期講起國際金融中心之爭，記得數年前我抄低咗個笑話，但搵唔番出處同作者，依家同大家分享。話說有一日上帝約齊紐約市長、上海市長同香港特首一齊食飯，席間上帝話：「你哋都係大城市嘅領導人，麻煩返去話畀你哋嘅市民知，明日就係世界末日。」3位領導都依上帝指示通知市民。紐約市長話：「有一個好消息同一個壞消息通知大家，好消息係『上帝真係存在』，但壞消息係明日就係世界末日。」上海市長就咁講：「依家有兩個壞消息，一個係『原來真係有上帝』，第二個係我哋已經嚟唔切追過香港。」最樂觀都係香港特首，佢話：「我有兩個好消息公布，首先係上帝認為香港同紐約、上海一樣重要，香港係亞洲國際大都會；第二個好消息係所有經濟同民生問題，明日都會得到解決。」

（大健）

若然有料想報畀大健或有嘢問，可電郵money.biz@opg.com.hk