回顧過去一個星期，相信無太多人預到，恒指周二失守萬八點跌到17,710點，是絕佳的入市時機。雖然恒指尋日跌穿萬九點關口，最後收報18,889點，但全星期計，則升210點或者1.1%。通縮之中我們高唱：現金就是王，資產價格不斷下滑，相反通脹期間，存戶成為大輸家，即使收埋利息都唔及資產價格升值速度，放喺銀行嘅錢，購買力按年下跌。

海嘯後的影響，今日全球通脹仲係相當溫和，甚至係無通脹，可是投資市場預期各國政府救市，增加貨幣供應及寬鬆貨幣政策，會維持一段時間，直到經濟有明顯起色至會收手，同時縱容通脹肆虐，這個想法會否成為事實，可能我哋去到今年底明年中先會有答案，但短息低到唔夠一厘，錢太多的情況，加上通脹預期足夠教股市升完再升。在見到資金明顯流走、港元轉弱之前，股民都係無謂諗太多，買股唔買市是也，但謹記即使唔睇好，亦唔好加入做淡。

寶勝回吐壓力未消

寶勝（03813）發盈警，估計三月底止半年業績會大倒退，原因是和運動品牌Converse的中國獨家品牌代理安排在去年底屆滿，加上海嘯及京奧後運動用品銷售放緩所致。

寶勝尋日急插0.1元，報收1.17元，睇番今年首季賺68.4萬美元，大跌96%，上半年業績難睇，市場係雞食放光蟲，有晒心理準備，睇番五月推介時股價仲喺0.8元附近，上星期已見1.43元，可見今日熱錢唔理好醜，最緊要就手，夠落後就乜都炒得一餐。Converse獨家代理完結，分析員一早有心理準備，預測今年賺3,650萬美元，只及○八年7,002萬美元一半左右，預期市盈率16.8倍，都係睇定啲，等十九日中期業績出來至算，短期回吐壓力應該未完。

收購項目穩賺不賠

獲母公司打補針，早已是中資窗口公司，提升業績的不成文習慣。上海實業（00363）以22億元人民幣，向母公司收購上海黃浦江西岸徐匯區四幢豪宅項目，總可售建築樓面10.352萬方米，項目鄰近上海世博會場，預期在明年前完工開賣。野村同上實計數，出價相當於每米收購成本1.9萬元人民幣，比同區現時市價4.2萬元人民幣低，一買一賣，上實幾乎是穩賺不賠。

昨日上實股價反高潮，倒跌2.05元以34.05元收市，反映現時股民確係愈來愈精明，分析利弊之餘，亦深明好消息沽貨之道！這類母公司提供一次過着數，雖然潤飾一兩年業績，但唔屬於持續營運項目。或者，找內部回報率有一成五至兩成的公路或者基建項目去投資，股民及基經理理都會更受落。不過，話說回頭，即使唔計這筆意外之財，上實今年預期市盈率15.5倍，對比唔少炒到癲嘅二三線股，估值合理，估計股價回到32至33元，經已有足夠吸引力。

戴峰修