本文重點
內地銀行保險混業經營成為近期熱話，一大堆內銀同保險公司都等緊監管部門批准，總之批得快好世界，一層層咁遞上去，直至國務院點頭為止，真係等到頸都長。早已排隊嘅滙豐日前公布喜訊，話佢哋已經獲批，同國民信託組合營。
外資同內地金融機構始終有唔同色彩，新嘅滙豐人壽公司高層由滙豐保險集團空降，由滙豐保險集團亞太區董事長湯德信出任新董事長，消息話總經理同營運總監都係香港保險界打滾多年嘅老建榮同陳楚俊出任，睇嚟滙豐保險產品嘅設計同審批應該會跟足香港模式。
敖寶蓮傳擔代理大旗
滙豐喺香港就靠櫃面及分行職員賣埋保險，少有專責代理跑數，但入到內地同內銀爭，基礎無咁優越，當然要搵番個主帥統籌跑數，市傳係由香港友邦出身嘅敖寶蓮揸代理隊伍大旗。敖寶蓮喺友邦廣州都征戰咗一段日子，加盟滙豐呢隊北征軍，外資行同內銀由銀行打到去保險混業，一定好戲連場。
余絲韻