本文重點
投行伙記人工高就係人都知，估唔到連用嘅枱櫈都價值不菲。已破產嘅雷曼兄弟賣咗證券業務畀英國巴克萊銀行，近期雷曼就入稟紐約法院，要求裁決位處紐約曼克頓大樓內嘅公司辦公室家具究竟誰屬，仲願意出價600萬美元（約4,680萬港元）購回呢批枱櫈、會議枱、視聽及保安器材。
與巴克萊對簿公堂
究竟雷曼點解肯用近「6球」買番自己用開嘅辦公室家具，絲絲就不得而知，不過雷曼喺入稟狀就話，今次回購家具係必須嘅，因為巴克萊認為部分大樓內嘅家具於購入證券業務時已一併售予他們。
雷曼及巴克萊今次要法庭相見，亦源於雷曼認為去年巴克萊收購其證券業務所承擔嘅負債水平，低於雙方傾談收購事宜時嘅負債。換句話說，巴克萊今次收購可謂趁危機執平貨，事實上，巴克萊喺○八年度報告話，因着收購雷曼北美業務獲取37.5億美元利益。雷曼上月已入稟法院，要求調查巴克萊有否就收購賺取特殊利益，話咁對雷曼及其債權人唔公平。
余絲韻