本文重點
一向對企業管理極有心得嘅海爾集團總裁張瑞敏，尋日喺華頓商學院全球校友嘅北京論壇上，再同大家分享心得。家陣各界正努力抵禦金融海嘯嘅負面影響，佢就提倡過冬應該游冬泳，即主動抗寒，迎戰不景氣。
企業管理因地制宜
被視為管理哲學兼具「智慧與卓有成效」嘅張瑞敏話畀大家聽，企業管理需要解決水土不服嘅問題，即每地民風不同，喺唔同國家開工廠，管理員工嘅方法亦有唔同。
好似海爾美國工廠嘅員工，你唔可以朝令夕改，啲工人隨時唔肯開工，因為佢哋好重視規矩。但去到內地又係另一回事，好似公司交帶員工每日抹枱5次，日本員工會日日抹，內地人可能今日抹5次，聽日抹3次，等到無王管時連1次都唔抹。
好多公司認為依家係景氣寒冬，講乜管理呢？但張瑞敏話咁諗就太保守，依家最好主動出擊面對難題，用不斷創新管理去適應中國嘅國情喎。
余絲韻