本文重點
現代美容（00919）尋日喺黃埔開新店，前主席曾裕亦有現身，絲絲即刻問佢健康如何，因為佢早前因健康問題唔做主席，佢話現時已經好番，日日都有去巡舖，不過粗重工作就由老公負責。
享受現狀 每日巡舖
佢同絲絲講，因為佢嘅心臟出現問題，決定退位讓賢，由老公李守義出任主席一職。佢現時精神幾好，既然健康大有改善，不如入番董事局啦！曾裕就話，返唔返入董事局都冇所謂，因為佢同公司嘅關係就好似同居嘅情侶，只欠一張結婚證明書，佢好享受依家嘅工作，每日去巡舖，教吓新人做嘢，公司開會嘅工作就留畀老公做。
講開現代美容，曾裕話公司次季嘅新增預售銷售生意好過首季，有輕微增長，至於開店計劃就要等豬流感（H1N1甲型流感）疫情穩定啲先。中國業務方面，佢哋喺內地有10間店舖，內地人嘅消費力仍然強勁，相信可以喺今年底達到收支平衡。
余絲韻