佢話如果條魚腐爛，唔會由條尾開始，佢冇講會由條魚嘅邊一部分開始，絲絲估計係冇特定位置。劉明康用呢個比喻講解公司治理對銀行好重要，即係話要全方位做好風險管理，否則銀行就會腐爛；即使客戶係中移、中鐵等聽落已經係好有實力嘅公司，無論係邊個，畀客戶嘅信貸額都唔可以超過銀行嘅淨值10%。

京菜配方去除毒產？

作為銀行監管者，劉明康十分關注銀行除毒進度，佢好肉緊話，全球剷除銀行毒資產嘅速度要快，有唔少銀行流血，時間好緊迫，最好快啲搵新嘅配方。講開新配方，佢順帶一提話北京菜好出名，如果大家想得到北京菜嘅配方，可以問佢，但係究竟有邊啲北京菜配方可以除毒，絲絲唔係北京人，真係冇頭緒。

余絲韻