本文重點
金融海嘯下，企業當然慳得就慳，就連一向以員工福利好見稱嘅搜尋器巨企Google，今年都決定取消一年一度嘅全公司大旅行，唔會好似過往咁去滑雪勝地度假，又或者好似去年咁去加州迪士尼樂園見吓米奇老鼠，改為化整為零，叫個別部門自己搞遊船河算數。
改為部門自己搞掂
Google員工福利好路人皆見，公司總部有任飲任食餐廳，又有桑拿室，更有大大個游泳池畀員工游水，員工更享有洗衣、剪髮及按摩等服務，一切都係貫徹「開心員工便是勤力員工」嘅公司理念。
公司發言人強調，今年「打散晒」員工去旅行唔係為咗慳錢，仲話全體大旅行只係公司規模仲係細嘅時候舉行，家陣公司全球員工達2萬人，部門搞細規模旅行有助員工認識日常工作嘅夥伴。
其實Google取消大旅行係情有可原，始終環境實在差，受客戶減少網上廣告，Google四月公布自○四年上市以來首次錄得季度盈利下降，加埋早排炒咗銷售及市務部200位員工，咁嘅時勢仲搞大旅行，真係礙眼咗啲。
余絲韻