本文重點
呢排個市好到不得了，間間公司都趁勢抽水集資，IPO活動亦開始活躍，個市仲傳話上實控股（00363）嚟緊下半年會好忙，事關除咗要收購公路同上海房地產項目外，仲會分拆業務喺香港上市。絲絲梗係第一時間搵上實老友求證吓啦，老友笑笑口話絲絲聽漏咗一樣，個市仲傳佢哋會配股呀，不過老友叫絲絲咪咁易信呢啲市場傳聞喎，事關上實家陣資金充裕，無諗過要配股之餘，更加無諗過要分拆業務上市添。
咁點解個市會傳得咁行嘅？老友話其實個市咁好，啲投行就梗係趁勢游說啲公司配吓股、分拆吓業務，等佢哋都可以從中賺吓錢。
下半年收購係堅料
呢一輪其實間間公司都會不停畀投行搵上門拉生意，上實當然唔例外，有投資銀行游說分拆業務上市同埋配股，但老友好肯定咁講，上實真係無咁嘅打算，仲叫絲絲咪再亂信人添，但收購就係真嘅，佢哋下半年會收購上海房地產同公路項目，總額仲一定高過去年嘅55.5億元收購價。
余絲韻