本文重點
滙豐美洲業務又畀人揭瘡疤，話說佢哋做到出晒名嘅信用卡業務，喺墨西哥嘅消費者組織調查入面居然「肥佬」，10分滿分只拎得4.5分，反而西班牙嘅BBVA（即係中信行（00998）嘅策略投資者）就以8.6分高踞榜首。
排名最低唔服氣
呢個墨西哥消費者組織調查咗當地18家銀行嘅信用卡業務，內容包括客戶條款、銀行網站及銀行廣告等各方面，10分滿分，5分合格，結果只有5家銀行「肥佬」，其中4家係小型嘅墨西哥土炮銀行，「肥佬」嘅大銀行就只有滙豐，仲要係排名最低添。
滙豐聽到自己唔合格仲要排第尾，當然會上訴啦。據了解，佢哋話有關調查用嘅根本係過期資料，依家畀客戶嘅資料透明度高咗，網站亦已有所改善。睇嚟兩邊駁火，大家有戲睇，娛樂性一定大增。
余絲韻