昨日恒指低開207點後，盤中一度低見18,564點，跌逾200點。不過低位承接力不弱，可能經過周一過山車走勢，缸邊友唔怕死，加上祖國魚缸跌幅收窄，中午左右，恒指又識拗腰上番去。下半場恒指一度高見18,883點，散場報收18,791點，僅升5點，始終未能企穩在18,800水平散場。國企指數則升47點，報收11,080點，似乎H股唔似得A股，咁怕祖國魚缸再為新丁開登場綠燈。

憂慮「息魔」地主腳軟

大笨象（00005）升逾1%，報收67.5元；祖國移動（00941）近日上升動力減弱，昨日僅升0.18%至83.1元。斷估專家普遍相信，具祖國背景的候任CEO李小加，可幫助港交所（00388）得到更完善的發展，港交所昨日升破一年高位，高見131.4元，散場報收130.4元，升1%。

炒完經濟復甦，孖屐開始憂慮「通脹怪獸」來襲，屆時不得不找「息魔」出馬鎮壓，市場擔心息口向上，本地地主受壓，跌勢持續。超人旗艦（00001）跟信置（00083）齊齊跌逾2%，前日一枝獨秀的斑點狗（00101）亦頂唔順，昨日跌4.8%。

不過，紅色地主卻跟本地地主背馳，由於祖國最新的經濟數據顯示，固定資產增長加快，亦保持升勢，加上祖國樓市復甦，日前廣州珠江新城區的地皮拍賣，賣價更創出新高，孖屐普遍相信，紅色地主將展開新一輪升浪。富力地產（02777）曾升至18.1元高位，報收17.96元，跟中國海外（00688）齊齊升逾4%；中渝置地（01224）更勁升6.4%，雅居樂（03383）重上雙位數，報收10元，升2%。

國壽財險仲未上力

以為紅色保險股追落後，但平保（02318）仍未復賽，祖國野獸（02628）跟財險（02328）唔識發力。紅色錢莊則個別發展，被傳再有策略投資者搞批盪的建行（00939）表現標青，跟招行（03968）齊齊升逾2%，工行（01398）升1.3%，表現中規中矩，中信行（00998）則升1.4%，交行（03328）繼續落後，微升0.3%，總好過中行（03988）逆市跌0.5%。

其實紅色分子都係輪流落鑊，之前古勝講過，內需股及消費股將會緊接資源股發力。昨日安踏體育（02020）走勢現突破，報收8.8元升2.4%，加上內地體育用品商361度國際（01361）下周招股，刺激同類股份造好。所有體育品牌已落實○九年末季的交易，安踏的末季定單按年增長25%，跑贏同業，其現價為○九年預測市盈率較李寧（02331）有折讓，估值仍具吸引力。

祖國消費漸入佳境

祖國以月份計的社會消費品零售總額，去年升幅閒閒地超過兩成，但今年卻顯著回落，在二月升幅降至近年低位11.6%，幸好三月和四月已回升至接近15%水平，反映祖國消費市場漸入佳境，「美人林」更發展吹水報告，大幅調高多隻消費股的投資評級及目標價。唔少大行好似「小魔怪」跟「種金」都睇好祖國品牌運動服行業，「最信」亦維持安踏的投資評級為「跑贏大市」，目標價10.05元。

古勝