本文重點
近排樓價不停升，唔少業主趁市旺，將原本用來收租嘅物業賣出去「賺番筆」，好似向來受長線投資者歡迎嘅港島區細價樓，喺租盤買少見少下，租金回報率亦升到近5厘，拍得住唔少新界收租物業。美聯老友黎泳傑同Vincent講，筲箕灣廣場嘅租盤由金融海嘯期間30個，跌到現時僅約10個，令租金同回報率一齊上升，其中麗文苑高層C室，面積458方呎，近排以月租7,000元租出，按業主四月份購入價175萬元計，租金回報率達4.8厘。
佢又話，近日筲箕灣區屋苑嘅投資者入市個案多咗，今個月區內屋苑暫錄15宗二手成交中，有近一半嘅買家係投資者。
中海濠盤首創私家泳池
中國海外（00688）喺澳門發展嘅寰宇天下，買家有唔少係來自中東、俄羅斯等嘅富豪，原來該盤嘅分層單位已沽清，現時尚餘特色單位有得賣，其中頂層嘅海景天際獨立屋「天池」，發展商話會採惜售策略，這個特色戶賣點在於設有澳門首創嘅私家泳池，住客可以喺500呎高度之上，一邊游水一邊睇澳氹海景，另外仲有逾1,000方呎嘅空中花園。單位總面積廣達8,200方呎，以六房四套房設計，大廳樓底高20呎，並設玻璃天幕，主人套房嘅面積亦廣達1,000方呎，採酒店式設計，以凸顯豪宅嘅氣派。
（Vincent Lau）