本文重點
飛達帽業（01100）舊年業績唔係太理想，老闆娘顏寶鈴話過，今年佢會發力搞好零售業務。佢同絲絲講，已全力投入零售業務，仲親自到內地各省睇舖同畀意見，今年四月已到過瀋陽及大連等，目標喺七月前行遍內地31個省市及自治區。老闆娘果然言出必行，全力訓身睇住盤零售生意。
親力親為搞好零售
顏仲話，雖然自己已經50歲，但仍然對生意好有激情同動力，話過要搞好盤零售生意，就一定要做到，所以佢親身到旗下嘅店舖與店員及加盟店傾偈，仲要諗吓點樣吸引多啲客人到店舖，甚至連店舖櫥窗設計佢都有份參與討論，而且要店長每日都向佢匯報生意情況。
另外，公司今年主力開拓內地二、三線城市嘅市場，呢個市場嘅消費力唔弱，市民都願意消費，佢為公司訂下目標，兩年內喺內地嘅店舖數目增至300至400間，店舖遍布全國31個省市區，最大嘅目標係於內地開設全亞洲區最大嘅Hello Kitty店。絲絲覺得，成日要去唔同地方睇舖，一定好辛苦，但佢話好享受周圍去，完全唔覺得辛苦喎。
余絲韻